ಅಧ್ಯರ್ಧಶತಕಂ ಪ್ರಸಾದಪ್ರತಿಭೋಧವ

ಅಧ್ಯರ್ಧಶತಕಂ ಪ್ರಸಾದಪ್ರತಿಭೋಧವ (ಶತಪಂಚಾಶತಕನಾಮಸ್ತೋತ್ರಂ) ಮಾತೃಚೇಟವಿರಚಿತಂ .

ಪರಿಚ್ಛೇದ ಸೂಚಿ  

1. ಉಪೋದ್ಘಾತಸ್ತವಃ.

2. ಹೇತುಸ್ತವಃ 

3. ನಿರುಪಮಸ್ತವಃ 

4. ಅದ್ಭುತಸ್ತವಃ 

5. ರೂಪಸ್ತವಃ.

6. ಕರುಣಾಸ್ತವಃ 

7. ವಚನಸ್ತವಃ 

8. ಶಾಸನಸ್ತವಃ 

9. ಪ್ರಣಿಧಿಸ್ತವಃ 

10. ಮಾರ್ಗಾವತಾರಸ್ತವಃ 

11. ದುಷ್ಕರಸ್ತವಃ 

12. ಕೌಶಲಸ್ತವಃ 

13. ಅನೃಣ್ಯಸ್ತವಃ 

1. ಉಪೋದ್ಘಾತಸ್ತವಃ

ನಮೋ ಬುದ್ಧಾಯ

ಸರ್ವದಾ ಸರ್ವಥಾ ಸರ್ವೇ ಯಸ್ಯ ದೋಷಾ ನ ಸಂತಿ ಹ .

ಸರ್ವೇ ಸರ್ವಾಭಿಸಾರೇಣ ಯತ್ರ ಚಾವಸ್ಥಿತಾ ಗುಣಾಃ .. 1..

ತಮೇವ ಶರಣಂ ಗಂತುಂ ತಂ ಸ್ತೋತುಂ ತಮುಪಾಸಿತುಂ .

ತಸ್ಯೈವ ಶಾಸನೇ ಸ್ಥಾತುಂ ನ್ಯಾಯ್ಯಂ ಯದ್ಯಸ್ತಿ ಚೇತನಾ .. 2..

ಸವಾಸನಾಶ್ಚ ತೇ ದೋಷಾ ನ ಸಂತ್ಯೇಕಸ್ಯ ತಾಯಿನಃ .

ಸರ್ವೇ ಸರ್ವವಿದಃ ಸಂತಿ ಗುಣಾಸ್ತೇ ಚಾನಪಾಯಿನಃ .. 3..

ನ ಹಿ ಪ್ರತಿನಿವಿಷ್ಟೋಽಪಿ ಮನೋವಾಕ್ಕಾಯಕರ್ಮಸು .

ಸಹ ಧರ್ಮೇಣ ಲಭತೇ ಕಶ್ಚಿದ್ಭಗವತೋಽನ್ತರಂ .. 4..

ಸೋಽಹಂ ಪ್ರಾಪ್ಯ ಮನುಷ್ಯತ್ವಂ ಸಸದ್ಧರ್ಮಮಹೋತ್ಸವಂ .

ಮಹಾರ್ಣವಯುಗಚ್ಛಿದ್ರಕೂರ್ಮಗ್ರೀವಾರ್ಪಣೋಪಮಂ .. 5..

ಅನಿತ್ಯತಾವ್ಯನುಸೃತಾಂ ಕರ್ಮಚ್ಛಿದ್ರಸಸಂಶಯಾಂ .

ಆತ್ತಸಾರಾಂ ಕರಿಷ್ಯಾಮಿ ಕಥಂ ನೇಮಾಂ ಸರಸ್ವತೀಂ .. 6..

ಇತ್ಯಸಂಖ್ಯೇಯವಿಷಯಾನವೇತ್ಯಾಪಿ ಗುಣಾನ್ಮುನೇಃ .

ತದೇಕದೇಶಪ್ರಣಯಃ ಕ್ರಿಯತೇ ಸ್ವಾರ್ಥಗೌರವಾತ್ .. 7..

ಸ್ವಯಂಭುವೇ ನಮಸ್ತೇಽಸ್ತು ಪ್ರಭೂತಾದ್ಭುತಕರ್ಮಣೇ .

ಯಸ್ಯ ಸಂಖ್ಯಾಪ್ರಭಾವಾಭ್ಯಾಂ ನ ಗುಣೇಷ್ವಸ್ತಿ ನಿಶ್ಚಯಃ .. 8..

ಇಯಂತ ಇತಿ ನಾಸ್ತ್ಯಂತ ಈದೃಶಾ ಇತಿ ಕಾ ಕಥಾ .

ಪುಣ್ಯಾ ಇತ್ಯೇವ ತು ಗುಣಾನ್ಪ್ರತಿ ತೇ ಮುಖರಾ ವಯಂ .. 9..

ಉಪೋದ್ಘಾತಸ್ತವೋ ನಾಮ ಪ್ರಥಮಃ ಪರಿಚ್ಛೇದಃ .

2. ಹೇತುಸ್ತವಃ

ವಿಷಹ್ಯಮವಿಷಹ್ಯಂ ವೇತ್ಯವಧೂಯ ವಿಚಾರಣಾಂ .

ಸ್ವಯಮಭ್ಯುಪಪನ್ನಂ ತೇ ನಿರಾಕ್ರಂದಮಿದಂ ಜಗತ್ .. 10..

ಅವ್ಯಾಪಾರಿತಸಾಧುಸ್ತ್ವಂ ತ್ವಮಕಾರಣವತ್ಸಲಃ .

ಅಸಂಸ್ತುತಸಖಶ್ಚ ತ್ವಮನವಸ್ಕೃತಬಾಂಧವಃ .. 11..

ಸ್ವಮಾಂಸಾನ್ಯಪಿ ದತ್ತಾನಿ ವಸ್ತುಷ್ವನ್ಯೇಷು ಕಾ ಕಥಾ .

ಪ್ರಾಣೈರಪಿ ತ್ವಯಾ ಸಾಧೋ ಮಾನಿತಃ ಪ್ರಣಯೀ ಜನಃ .. 12..

ಸ್ವೈಃ ಶರೀರೈಃ ಶರೀರಾಣಿ ಪ್ರಾಣೈಃ ಪ್ರಾಣಾಃ ಶರೀರಿಣಾಂ .

ಜಿಘಾಂಸುಭಿರುಪಾತ್ತಾನಾಂ ಕ್ರೀತಾನಿ ಶತಶಸ್ತ್ವಯಾ .. 13..

ನ ದುರ್ಗತಿಭಯಾನ್ನೇಷ್ಟಾಮಭಿಪ್ರಾರ್ಥಯತಾ ಗತಿಂ .

ಕೇವಲಾಶಯಶುದ್ಧ್ಯೈವ ಶೀಲಂ ಸಾತ್ಮೀಕೃತಂ ತ್ವಯಾ .. 14..

ಜಿಹ್ಮಾನಾಂ ನಿತ್ಯವಿಕ್ಷೇಪಾದೃಜೂನಾಂ ನಿತ್ಯಸೇವನಾತ್ .

ಕರ್ಮಣಾಂ ಪರಿಶುದ್ಧಾನಾಂ ತ್ವಮೇಕಾಯನತಾಂ ಗತಃ .. 15..

ಪೀಡ್ಯಮಾನೇನ ಬಹುಶಸ್ತ್ವಯಾ ಕಲ್ಯಾಣಚೇತಸಾ .

ಕ್ಲೇಶೇಷು ವಿವೃತಂ ತೇಜೋ ಜನಃ ಕ್ಲಿಷ್ಟೋಽನುಕಂಪಿತಃ .. 16..

ಪರಾರ್ಥೇ ತ್ಯಜತಃ ಪ್ರಾಣಾನ್ಯಾ ಪ್ರೀತಿರಭವತ್ ತವ .

ನ ಸಾ ನಷ್ಟೋಪಲಬ್ಧೇಷು ಪ್ರಾಣೇಷು ಪ್ರಾಣಿನಾಂ ಭವೇತ್ .. 17..

ಯದ್ರುಜಾನಿರಪೇಕ್ಷಸ್ಯ ಚ್ಛಿದ್ಯಮಾನಸ್ಯ ತೇಽಸಕೃತ್ .

ವಧಕೇಷ್ವಪಿ ಸತ್ತ್ವೇಷು ಕಾರುಣ್ಯಮಭವತ್ ಪ್ರಭೋ .. 18..

ಸಮ್ಯಕ್ಸಂಬೋಧಿಬೀಜಸ್ಯ ಚಿತ್ತರತ್ನಸ್ಯ ತಸ್ಯ ತೇ .

ತ್ವಮೇವ ವೀರ ಸಾರಜ್ಞೋ ದೂರೇ ತಸ್ಯೇತರೋ ಜನಃ .. 19..

ನಾಕೃತ್ವಾ ದುಷ್ಕರಂ ಕರ್ಮ ದುರ್ಲಭಂ ಲಭ್ಯತೇ ಪದಂ .

ಇತ್ಯಾತ್ಮನಿರಪೇಕ್ಷೇಣ ವೀರ್ಯಂ ಸಂವರ್ಧಿತಂ ತ್ವಯಾ .. 20..

ವಿಶೇಷೋತ್ಕರ್ಷನಿಯಮೋ ನ ಕದಾ ಚಿದಭೂತ್ ತವ .

ಅತಸ್ತ್ವಯಿ ವಿಶೇಷಾಣಾಂ ಛಿನ್ನಸ್ತರತಮಕ್ರಮಃ .. 21..

ಸುಸುಖೇಷ್ವಪಿ ಸಂಗೋಽಭೂತ್ ಸಫಲೇಷು ಸಮಾಧಿಷು .

ನ ತೇ ನಿತ್ಯಾನುಬದ್ಧಸ್ಯ ಮಹಾಕರುಣಯಾ ಹೃದಿ .. 22..

ತ್ವಾದೃಶಾನ್ಪೀಡಯತ್ಯೇವ ನಾನುಗೃಹ್ಣಾತಿ ತತ್ ಸುಖಂ .

ಪ್ರಣೀತಮಪಿ ಸದ್ವೃತ್ತಂ ಯದಸಾಧಾರಣಂ ಪರೈಃ .. 23..

ವಿಮಿಶ್ರಾತ್ ಸಾರಮಾದತ್ತಂ ಸರ್ವಂ ಪೀತಮಕಲ್ಮಷಂ .

ತ್ವಯಾ ಸೂಕ್ತಂ ದುರುಕ್ತಂ ತು ವಿಷವತ್ ಪರಿವರ್ಜಿತಂ .. 24..

ಕ್ರೀಣತಾ ರತ್ನಸಾರಜ್ಞ ಪ್ರಾಣೈರಪಿ ಸುಭಾಷಿತಂ .

ಪರಾಕ್ರಾಂತಂ ತ್ವಯಾ ಬೋಧೌ ತಾಸು ತಾಸೂಪಪತ್ತಿಷು .. 25..

ಇತಿ ತ್ರಿಭಿರಸಂಖ್ಯೇಯೈರೇವಮುದ್ಯಚ್ಛತಾ ತ್ವಯಾ .

ವ್ಯವಸಾಯದ್ವಿತೀಯೇನ ಪ್ರಾಪ್ತಂ ಪದಮನುತ್ತರಂ .. 26..

ಹೇತುಸ್ತವೋ ನಾಮ ದ್ವಿತೀಯಃ ಪರಿಚ್ಛೇದಃ .

3. ನಿರುಪಮಸ್ತವಃ

ಅಕೃತ್ವೇರ್ಷ್ಯಾಂ ವಿಶಿಷ್ಟೇಷು ಹೀನಾನನವಮತ್ಯ ಚ .

ಅಗತ್ವಾ ಸದೃಶೈಃ ಸ್ಪರ್ಧಾಂ ತ್ವಂ ಲೋಕೇ ಶ್ರೇಷ್ಠತಾಂ ಗತಃ .. 27..

ಹೇತುಷ್ವಭಿನಿವೇಶೋಽಭೂದ್ಗುಣಾನಾಂ ನ ಫಲೇಷು ತೇ .

ತೇನ ಸಮ್ಯಕ್ಪ್ರತಿಪದಾ ತ್ವಯಿ ನಿಷ್ಠಾಂ ಗುಣಾ ಗತಾಃ .. 28..

ತಥಾತ್ಮಾ ಪ್ರಚಯಂ ನೀತಸ್ತ್ವಯಾ ಸುಚರಿತೈರ್ಯಥಾ .

ಪುಣ್ಯಾಯತನತಾಂ ಪ್ರಾಪ್ತಾನ್ಯಪಿ ಪಾದರಜಾಂಸಿ ತೇ .. 29..

ಕರ್ಶಯಿತ್ವೋದ್ಧೃತಾ ದೋಷಾ ವರ್ಧಯಿತ್ವಾ ವಿಶೋಧಿತಾಃ .

ಗುಣಾಸ್ತೇನ ಸುನೀತೇನ ಪರಾಂ ಸಿದ್ಧಿಂ ತ್ವಮಧ್ಯಗಾಃ .. 30..

ತಥಾ ಸರ್ವಾಭಿಸಾರೇಣ ದೋಷೇಷು ಪ್ರಹೃತಂ ತ್ವಯಾ .

ಯಥೈಷಾಮಾತ್ಮಸಂತಾನೇ ವಾಸನಾಪಿ ನ ಶೇಷಿತಾ .. 31..

ತಥಾ ಸಂಭೃತ್ಯ ಸಂಭೃತ್ಯ ತ್ವಯಾತ್ಮನ್ಯಾಹಿತಾ ಗುಣಾಃ .

ಪ್ರತಿರೂಪಕಮಪ್ಯೇಷಾಂ ಯಥಾ ನಾನ್ಯತ್ರ ದೃಶ್ಯತೇ .. 32..

ಉಪಘಾತಾವರಣವನ್ಮಿತಕಾಲಂ ಪ್ರದೇಶಿ ಚ .

ಸುಲಭಾತಿಶಯಂ ಸರ್ವಮುಪಮಾವಸ್ತು ಲೌಕಿಕಂ .. 33..

ಅದ್ವಂದ್ವಿನಾಮಗಮ್ಯಾನಾಂ ಧ್ರುವಾಣಾಮನಿವರ್ತಿನಾಂ .

ಅನುತ್ತರಾಣಾಂ ಕಾ ತರ್ಹಿ ಗುಣಾನಾಮುಪಮಾಸ್ತು ತೇ .. 34..

ಗೋಷ್ಪದೋತ್ತಾನತಾಂ ಯಾತಿ ಗಾಂಭೀರ್ಯಂ ಲವಣಾಂಭಸಃ .

ಯದಾ ತೇ ಬುದ್ಧಿಗಾಂಭೀರ್ಯಮಗಾಧಾಪಾರಮೀಕ್ಷತೇ .. 35..

ಶಿರೀಷಪಕ್ಷ್ಮಾಗ್ರಲಘು ಸ್ಥೈರ್ಯಂ ಭವತಿ ಪಾರ್ಥಿವಂ .

ಅಕಂಪ್ಯೇ ಸರ್ವಧರ್ಮಾಣಾಂ ತ್ವತ್ಸ್ಥೈರ್ಯೇಽಭಿಮುಖೀಕೃತೇ .. 36..

ಅಜ್ಞಾನತಿಮಿರಘ್ನಸ್ಯ ಜ್ಞಾನಾಲೋಕಸ್ಯ ತೇ ಮುನೇ .

ನ ರವಿರ್ವಿಷಯೇ ಭೂಮಿಂ ಖಾದ್ಯೋತೀಮಪಿ ವಿಂದತಿ .. 37..

ಮಲಿನತ್ವಮಿವಾಯಾಂತಿ ಶರಚ್ಚಂದ್ರಾಂಬರಾಂಭಸಾಂ .

ತವ ವಾಗ್ಬುದ್ಧಿಚೇಷ್ಟಾನಾಂ ಶುದ್ಧಿಂ ಪ್ರತಿ ವಿಶುದ್ಧಯಃ .. 38..

ಅನೇನ ಸರ್ವಂ ವ್ಯಾಖ್ಯಾತಂ ಯತ್ ಕಿಂ ಚಿತ್ ಸಾಧು ಲೌಕಿಕಂ .

ದೂರೇ ಹಿ ಬುದ್ಧಧರ್ಮಾಣಾಂ ಲೋಕಧರ್ಮಾಸ್ತಪಸ್ವಿನಃ .. 39..

ಯಸ್ಯೈವ ಧರ್ಮರತ್ನಸ್ಯ ಪ್ರಾಪ್ತ್ಯಾ ಪ್ರಾಪ್ತಸ್ತ್ವಮಗ್ರತಾಂ .

ತೇನೈವ ಕೇವಲಂ ಸಾಧೋ ಸಾಮ್ಯಂ ತೇ ತಸ್ಯ ಚ ತ್ವಯಾ .. 40..

ಆತ್ಮೇಚ್ಛಾಚ್ಛಲಮಾತ್ರಂ ತು ಸಾಮಾನ್ಯೋಪಾಂಶು ಕಿಂ ಚನ .

ಯತ್ರೋಪಕ್ಷಿಪ್ಯ ಕಥ್ಯೇತ ಸಾ ವಕ್ತುರತಿಲೋಲತಾ .. 41..

ನಿರುಪಮಸ್ತವೋ ನಾಮ ತೃತೀಯಃ ಪರಿಚ್ಛೇದಃ .

4. ಅದ್ಭುತಸ್ತವಃ

ಪ್ರತನ್ವಿವ ಹಿ ಪಶ್ಯಾಮಿ ಧರ್ಮತಾಮನುಚಿಂತಯನ್ .

ಸರ್ವಂ ಚಾವರ್ಜಿತಂ ಮಾರವಿಜಯಂ ಪ್ರತಿ ತೇ ಜಗತ್ .. 42..

ಮಹತೋಽಪಿ ಹಿ ಸಂರಂಭಾತ್ ಪ್ರತಿಹಂತುಂ ಸಮುದ್ಯತಃ .

ಕ್ಷಮಾಯಾ ನಾತಿಭಾರೋಽಸ್ತಿ ಪಾತ್ರಸ್ಥಾಯಾ ವಿಶೇಷತಃ .. 43..

ಯತ್ ತು ಮಾರಜಯಾನ್ವಕ್ಷಂ ಸುಮಹತ್ ಕ್ಲೇಶವೈಶಸಂ .

ತಸ್ಯಾಮೇವ ಕೃತಂ ರಾತ್ರೌ ತದೇವ ಪರಮಾದ್ಭುತಂ .. 44..

ತಮೋವಿಧಮನೇ ಭಾನೋರ್ಯಃ ಸಹಸ್ರಾಂಶುಮಾಲಿನಃ .

ವೀರ ವಿಸ್ಮಯಮಾಗಚ್ಛೇತ್ ಸ ತೀರ್ಥ್ಯವಿಜಯೇ ತವ .. 45..

ಸರಾಗೋ ವೀತರಾಗೇಣ ಜಿತರೋಷೇಣ ರೋಷಣಃ .

ಮೂಢೋ ವಿಗತಮೋಹೇನ ತ್ರಿಭಿರ್ನಿತ್ಯಂ ಜಿತಾಸ್ತ್ರಯಃ .. 46..

ಪ್ರಶಂಸಸಿ ಚ ಸದ್ಧರ್ಮಾನಸದ್ಧರ್ಮಾನ್ವಿಗರ್ಹಸಿ .

ಅನುರೋಧವಿರೋಧೌ ಚ ನ ಸ್ತಃ ಸದಸತೋಸ್ತವ .. 47..

ನೈವಾರ್ಹತ್ಸು ನ ತೀರ್ಥ್ಯೇಷು ಪ್ರತಿಘಾನುನಯಂ ಪ್ರತಿ .

ಯಸ್ಯ ತೇ ಚೇತಸೋಽನ್ಯತ್ವಂ ತಸ್ಯ ತೇ ಕಾ ಸ್ತುತಿರ್ಭವೇತ್ .. 48..

ಗುಣೇಷ್ವಪಿ ನ ಸಂಗೋಽಭೂತ್ ತೃಷ್ಣಾ ನ ಗುಣವತ್ಸ್ವಪಿ .

ಅಹೋ ತೇ ಸುಪ್ರಸನ್ನಸ್ಯ ಸತ್ತ್ವಸ್ಯ ಪರಿಶುದ್ಧತಾ .. 49..

ಇಂದ್ರಿಯಾಣಾಂ ಪ್ರಸಾದೇನ ನಿತ್ಯಕಾಲಾನಪಾಯಿನಾ .

ಮನೋ ನಿತ್ಯಪ್ರಸನ್ನಂ ತೇ ಪ್ರತ್ಯಕ್ಷಮಿವ ದೃಶ್ಯತೇ .. 50..

ಆಬಾಲೇಭ್ಯಃ ಪ್ರಸಿದ್ಧಾಸ್ತೇ ಮತಿಸ್ಮೃತಿವಿಶುದ್ಧಯಃ .

ಗಮಿತಾ ಭಾವಪಿಶುನೈಃ ಸುವ್ಯಾಹೃತಸುಚೇಷ್ಟಿತೈಃ .. 51..

ಅದ್ಭುತಸ್ತವೋ ನಾಮ ಚತುರ್ಥಃ ಪರಿಚ್ಛೇದಃ .

5. ರೂಪಸ್ತವಃ

ಉಪಶಾಂತಂ ಚ ಕಾಂತಂ ಚ ದೀಪ್ತಮಪ್ರತಿಘಾತಿ ಚ .

ನಿಭೃತಂ ಚೋರ್ಜಿತಂ ಚೇದಂ ರೂಪಂ ಕಮಿವ ನಾಕ್ಷಿಪೇತ್ .. 52..

ಯೇನಾಪಿ ಶತಶೋ ದೃಷ್ಟಂ ಯೋಽಪಿ ತತ್ಪೂರ್ವಮೀಕ್ಷತೇ .

ರೂಪಂ ಪ್ರೀಣಾತಿ ತೇ ಚಕ್ಷುಃ ಸಮಂ ತದುಭಯೋರಪಿ .. 53..

ಅಸೇಚನಕಭಾವಾದ್ಧಿ ಸೌಮ್ಯಭಾವಾಚ್ಚ ತೇ ವಪುಃ .

ದರ್ಶನೇ ದರ್ಶನೇ ಪ್ರೀತಿಂ ವಿದಧಾತಿ ನವಾಂ ನವಾಂ .. 54..

ಅಧಿಷ್ಠಾನಗುಣೈರ್ಗಾತ್ರಮಧಿಷ್ಠಾತೃಗುಣೈರ್ಗುಣಾಃ .

ಪರಯಾ ಸಂಪದೋಪೇತಾಸ್ತವಾನ್ಯೋನ್ಯಾನುರೂಪಯಾ .. 55..

ಕ್ವಾನ್ಯತ್ರ ಸುನಿವಿಷ್ಟಾಃ ಸ್ಯುರಿಮೇ ತಾಥಾಗತಾ ಗುಣಾಃ .

ಋತೇ ರೂಪಾತ್ ತವೈವಾಸ್ಮಾಲ್ ಲಕ್ಷಣವ್ಯಂಜನೋಜ್ಜ್ವಲಾತ್ .. 56..

ಧನ್ಯಮಸ್ಮೀತಿ ತೇ ರೂಪಂ ವದತೀವಾಶ್ರಿತಾನ್ಗುಣಾನ್ .

ಸುನಿಕ್ಷಿಪ್ತಾ ವಯಮಿತಿ ಪ್ರತ್ಯಾಹುರಿವ ತದ್ಗುಣಾಃ .. 57..

ರುಪಸ್ತವೋ ನಾಮ ಪಂಚಮಃ ಪರಿಚ್ಛೇದಃ .

6. ಕರುಣಾಸ್ತವಃ

ಸರ್ವಮೇವಾವಿಶೇಷೇಣ ಕ್ಲೇಶೈರ್ಬದ್ಧಮಿದಂ ಜಗತ್ .

ತ್ವಂ ಜಗತ್ಕ್ಲೇಶಮೋಕ್ಷಾರ್ಥಂ ಬದ್ಧಃ ಕರುಣಯಾ ಚಿರಂ .. 58..

ಕಂ ನು ಪ್ರಥಮತೋ ವಂದೇ ತ್ವಾಂ ಮಹಾಕರುಣಾಮುತ .

ಯಯೈವಮಪಿ ದೋಷಜ್ಞಸ್ತ್ವಂ ಸಂಸಾರೇ ಧೃತಶ್ಚಿರಂ .. 59..

ವಿವೇಕಸುಖಸಾತ್ಮ್ಯಸ್ಯ ಯದಾಕೀರ್ಣಸ್ಯ ತೇ ಗತಾಃ .

ಕಾಲಾ ಲಬ್ಧಪ್ರಸರಯಾ ತತ್ ತೇ ಕರುಣಯಾ ಕೃತಂ .. 60..

ಶಾಂತಾದರಣ್ಯಾದ್ಗ್ರಾಮಾಂತಂ ತ್ವಂ ಹಿ ನಾಗ ಇವ ಹ್ರದಾತ್ .

ವಿನೇಯಾರ್ಥಂ ಕರುಣಯಾ ವಿದ್ಯಯೇವಾವಕೃಷ್ಯಸೇ .. 61..

ಪರಮೋಪಶಮಸ್ಥೋಽಪಿ ಕರುಣಾಪರವತ್ತಯಾ .

ಕಾರಿತಸ್ತ್ವಂ ಪದನ್ಯಾಸಂ ಕುಶೀಲವಕಲಾಸ್ವಪಿ .. 62..

ಋದ್ಧಿರ್ಯಾ ಸಿಂಹನಾದಾ ಯೇ ಸ್ವಗುಣೋದ್ಭಾವನಾಶ್ಚ ಯಾಃ .

ವಾಂತೇಚ್ಛೋಪವಿಚಾರಸ್ಯ ಕಾರುಣ್ಯನಿಕಷಃ ಸ ತೇ .. 63..

ಪರಾರ್ಥೈಕಾಂತಕಲ್ಯಾಣೀ ಕಾಮಂ ಸ್ವಾಶ್ರಯನಿಷ್ಠುರಾ .

ತ್ವಯ್ಯೇವ ಕೇವಲಂ ನಾಥ ಕರುಣಾಕರುಣಾಭವತ್ .. 64..

ತಥಾ ಹಿ ಕೃತ್ವಾ ಶತಧಾ ಧೀರಾ ಬಲಿಮಿವ ಕ್ವ ಚಿತ್ .

ಪರೇಷಾಮರ್ಥಸಿದ್ಧ್ಯರ್ಥಂ ತ್ವಾಂ ವಿಕ್ಷಿಪ್ತವತೀ ದಿಶಃ .. 65..

ತ್ವದಿಚ್ಛಯೈವ ತು ವ್ಯಕ್ತಮನುಕೂಲಾ ಪ್ರವರ್ತತೇ .

ತಥಾ ಹಿ ಬಾಧಮಾನಾಪಿ ತ್ವಾಂ ಸತೀ ನಾಪರಾಧ್ಯತೇ .. 66..

ಕರುಣಾಸ್ತವೋ ನಾಮ ಷಷ್ಠಃಪರಿಚ್ಛೇದಃ .

7. ವಚನಸ್ತವಃ

ಸುಪದಾನಿ ಮಹಾರ್ಥಾನಿ ತಥ್ಯಾನಿ ಮಧುರಾಣಿ ಚ .

ಗೂಢೋತ್ತಾನೋಭಯಾರ್ಥಾನಿ ಸಮಾಸವ್ಯಾಸವಂತಿ ಚ .. 67..

ಕಸ್ಯ ನ ಸ್ಯಾದುಪಶ್ರುತ್ಯ ವಾಕ್ಯಾನ್ಯೇವಂವಿಧಾನಿ ತೇ .

ತ್ವಯಿ ಪ್ರತಿಹತಸ್ಯಾಪಿ ಸರ್ವಜ್ಞ ಇತಿ ನಿಶ್ಚಯಃ .. 68..

ಪ್ರಾಯೇಣ ಮಧುರಂ ಸರ್ವಮಗತ್ಯಾ ಕಿಂ ಚಿದನ್ಯಥಾ .

ವಾಕ್ಯಂ ತವಾರ್ಥಸಿದ್ಧ್ಯಾ ತು ಸರ್ವಮೇವ ಸುಭಾಷಿತಂ .. 69..

ಯಚ್ಛ್ಲಕ್ಷ್ಣಂ ಯಚ್ಚ ಪರುಷಂ ಯದ್ವಾ ತದುಭಯಾನ್ವಿತಂ .

ಸರ್ವಮೇವೈಕರಸತಾಂ ವಿಮರ್ದೇ ಯಾತಿ ತೇ ವಚಃ .. 70..

ಅಹೋ ಸುಪರಿಶುದ್ಧಾನಾಂ ಕರ್ಮಣಾಂ ನೈಪುಣಂ ಪರಂ .

ಯೈರಿದಂ ವಾಕ್ಯರತ್ನಾನಾಮೀದೃಶಂ ಭಾಜನಂ ಕೃತಂ .. 71..

ಅಸ್ಮಾದ್ಧಿ ನೇತ್ರಸುಭಗಾದಿದಂ ಶ್ರುತಿಮನೋಹರಂ .

ಮುಖಾತ್ ಕ್ಷರತಿ ತೇ ವಾಕ್ಯಂ ಚಂದ್ರಾದ್ದ್ರವಮಿವಾಮೃತಂ .. 72..

ರಾಗರೇಣುಂ ಪ್ರಶಮಯದ್ವಾಕ್ಯಂ ತೇ ಜಲದಾಯತೇ .

ವೈನತೇಯಾಯತೇ ದ್ವೇಷಭುಜಂಗೋದ್ಧರಣಂ ಪ್ರತಿ .. 73..

ದಿವಾಕರಾಯತೇ ಭೂಯೋಽಪ್ಯಜ್ಞಾನತಿಮಿರಂ ನುದತ್ .

ಶಕ್ರಾಯುಧಾಯತೇ ಮಾನಗಿರೀನಭಿವಿದಾರಯತ್ .. 74..

ದೃಷ್ಟಾರ್ಥತ್ವಾದವಿತಥಂ ನಿಷ್ಕ್ಲೇಶತ್ವಾದನಾಕುಲಂ .

ಗಮಕಂ ಸುಪ್ರಯುಕ್ತತ್ವಾತ್ ತ್ರಿಕಲ್ಯಾಣಂ ಹಿ ತೇ ವಚಃ .. 75..

ಮನಾಂಸಿ ತಾವಚ್ಛ್ರೋತೄಣಾಂ ಹರಂತ್ಯಾದೌ ವಚಾಂಸಿ ತೇ .

ತತೋ ವಿಮೃಶ್ಯಮಾನಾನಿ ರಜಾಂಸಿ ಚ ತಮಾಂಸಿ ಚ .. 76..

ಆಶ್ವಾಸನಂ ವ್ಯಸನಿನಾಂ ತ್ರಾಸನಂ ಚ ಪ್ರಮಾದಿನಾಂ .

ಸಂವೇಜನಂ ಚ ಸುಖಿನಾಂ ಯೋಗವಾಹಿ ವಚಸ್ತವ .. 77..

ವಿದುಷಾಂ ಪ್ರೀತಿಜನನಂ ಮಧ್ಯಾನಾಂ ಬುದ್ಧಿವರ್ಧನಂ .

ತಿಮಿರಘ್ನಂ ಚ ಮಂದಾನಾಂ ಸಾರ್ವಜನ್ಯಮಿದಂ ವಚಃ .. 78..

ಅಪಕರ್ಷತಿ ದೃಷ್ಟಿಭ್ಯೋ ನಿರ್ವಾಣಮುಪಕರ್ಷತಿ .

ದೋಷಾನ್ನಿಷ್ಕರ್ಷತಿ ಗುಣಾನ್ವಾಕ್ಯಂ ತೇಽಭಿಪ್ರವರ್ಷತಿ .. 79..

ಸರ್ವತ್ರಾವ್ಯಾಹತಾ ಬುದ್ಧಿಃ ಸರ್ವತ್ರೋಪಸ್ಥಿತಾ ಸ್ಮೃತಿಃ .

ಅವಂಧ್ಯಂ ತೇನ ಸರ್ವತ್ರ ಸರ್ವಂ ವ್ಯಾಕರಣಂ ತವ .. 80..

ಯನ್ನಾದೇಶೇ ನ ಚಾಕಾಲೇ ನೈವಾಪಾತ್ರೇ ಪ್ರವರ್ತಸೇ .

ವೀರ್ಯಂ ಸಮ್ಯಗಿವಾರಬ್ಧಂ ತೇನಾಮೋಘಂ ವಚಸ್ತವ .. 81..

ವಚನಸ್ತವೋ ನಾಮ ಸಪ್ತಮಃ ಪರಿಚ್ಛೇದಃ .

8. ಶಾಸನಸ್ತವಃ

ಏಕಾಯನಂ ಸುಖೋಪಾಯಂ ಸ್ವನುಬಂಧಿ ನಿರತ್ಯಯಂ .

ಆದಿಮಧ್ಯಾಂತಕಲ್ಯಾಣಂ ತವ ನಾನ್ಯಸ್ಯ ಶಾಸನಂ .. 82..

ಏವಮೇಕಾಂತಕಾಂತಂ ತೇ ದೃಷ್ಟಿರಾಗೇಣ ಬಾಲಿಶಾಃ .

ಮತಂ ಯದಿ ವಿಗರ್ಹಂತಿ ನಾಸ್ತಿ ದೃಷ್ಟಿಸಮೋ ರಿಪುಃ .. 83..

ಅನ್ವಭುಂಕ್ಥಾ ಯದಸ್ಯಾರ್ಥೇ ಜಗತೋ ವ್ಯಸನಂ ಬಹು .

ತತ್ ಸಂಸ್ಮೃತ್ಯ ವಿರೂಪೇಽಪಿ ಸ್ಥೇಯಂ ತೇ ಶಾಸನೇ ಭವೇತ್ .. 84..

ಪ್ರಾಗೇವ ಹಿತಕರ್ತುಶ್ಚ ಹಿತವಕ್ತುಶ್ಚ ಶಾಸನಂ .

ಕಥಂ ನ ನಾಮ ಕಾರ್ಯಂ ಸ್ಯಾದಾದೀಪ್ತಶಿರಸಾಪಿ ತೇ .. 85..

ಭುಜಿಷ್ಯತಾ ಬೋಧಿಸುಖಂ ತ್ವದ್ಗುಣಾಪಚಿತಿಃ ಶಮಃ .

ಪ್ರಾಪ್ಯತೇ ತ್ವನ್ಮತಾತ್ ಸರ್ವಮಿದಂ ಭದ್ರಚತುಷ್ಟಯಂ .. 86..

ತ್ರಾಸನಂ ಸರ್ವತೀರ್ಥ್ಯಾನಾಂ ನಮುಚೇರುಪತಾಪನಂ .

ಆಶ್ವಾಸನಂ ನೃದೇವಾನಾಂ ತವೇದಂ ವೀರ ಶಾಸನಂ .. 87..

ತ್ರೈಧಾತುಕಮಹಾಭೌಮಮಸಂಗಮನವಗ್ರಹಂ .

ಶಾಸನೇನ ತವಾಕ್ರಾಂತಮಂತಕಸ್ಯಾಪಿ ಶಾಸನಂ .. 88..

ತ್ವಚ್ಛಾಸನನಯಜ್ಞೋ ಹಿ ತಿಷ್ಠೇತ್ ಕಲ್ಪಮಪೀಚ್ಛಯಾ .

ಪ್ರಯಾತಿ ತತ್ರ ತು ಸ್ವೈರೀ ಯತ್ರ ಮೃತ್ಯೋರಗೋಚರಃ .. 89..

ಆಗಮಸ್ಯಾರ್ಥಚಿಂತಾಯಾ ಭಾವನೋಪಾಸನಸ್ಯ ಚ .

ಕಾಲತ್ರಯವಿಭಾಗೋಽಸ್ತಿ ನಾನ್ಯತ್ರ ತವ ಶಾಸನಾತ್ .. 90..

ಏವಂ ಕಲ್ಯಾಣಕಲಿಲಂ ತವೇದಂ ಋಷಿಪುಂಗವ .

ಶಾಸನಂ ನಾದ್ರಿಯಂತೇ ಯತ್ ಕಿಂ ವೈಶಸತರಂ ತತಃ .. 91..

ಶಾಸನಸ್ತವೋ ನಾಮಾಷ್ಟಮಃ ಪರಿಚ್ಛೇದಃ .

9. ಪ್ರಣಿಧಿಸ್ತವಃ

ಶ್ರವಣಂ ತರ್ಪಯತಿ ತೇ ಪ್ರಸಾದಯತಿ ದರ್ಶನಂ .

ವಚನಂ ಹ್ಲಾದಯತಿ ತೇ ವಿಮೋಚಯತಿ ಶಾಸನಂ .. 92..

ಪ್ರಸೂತಿರ್ಹರ್ಷಯತಿ ತೇ ವೃದ್ಧಿರ್ನಂದಯತಿ ಪ್ರಜಾಃ .

ಪ್ರವೃತ್ತಿರನುಗೃಹ್ಣಾತಿ ನಿವೃತ್ತಿರುಪಹಂತಿ ಚ .. 93..

ಕೀರ್ತನಂ ಕಿಲ್ಬಿಷಹರಂ ಸ್ಮರಣಂ ತೇ ಪ್ರಮೋದನಂ .

ಅನ್ವೇಷಣಂ ಮತಿಕರಂ ಪರಿಜ್ಞಾನಂ ವಿಶೋಧನಂ .. 94..

ಶ್ರೀಕರಂ ತೇಽಭಿಗಮನಂ ಸೇವನಂ ಧೀಕರಂ ಪರಂ .

ಭಜನಂ ನಿರ್ಭಯಕರಂ ಶಂಕರಂ ಪರ್ಯುಪಾಸನಂ .. 95..

ಶೀಲೋಪಸಂಪದಾ ಶುದ್ಧಃ ಪ್ರಸನ್ನೋ ಧ್ಯಾನಸಂಪದಾ .

ತ್ವಂ ಪ್ರಜ್ಞಾಸಂಪದಾಕ್ಷೋಭ್ಯೋ ಹ್ರದಃ ಪುಣ್ಯಮಯೋ ಮಹಾನ್ .. 96..

ರೂಪಂ ದ್ರಷ್ಟವ್ಯರತ್ನಂ ತೇ ಶ್ರವ್ಯರತ್ನಂ ಸುಭಾಷಿತಂ .

ಧರ್ಮೋ ವಿಚಾರಣಾರತ್ನಂ ಗುಣರತ್ನಾಕರೋ ಹ್ಯಸಿ .. 97..

ತ್ವಮೋಘೈರುಹ್ಯಮಾನಾನಾಂ ದ್ವೀಪಸ್ತ್ರಾಣಂ ಕ್ಷತಾತ್ಮನಾಂ .

ಶರಣಂ ಭವಭೀರೂಣಾಂ ಮುಮುಕ್ಷೂಣಾಂ ಪರಾಯಣಂ .. 98..

ಸತ್ಪಾತ್ರಂ ಶುದ್ಧವೃತ್ತತ್ವಾತ್ ಸತ್ಕ್ಷೇತ್ರಂ ಫಲಸಂಪದಾ .

ಸನ್ಮಿತ್ರಂ ಹಿತಕಾರಿತ್ವಾತ್ ಸರ್ವಪ್ರಾಣಭೃತಾಮಸಿ .. 99..

ಪ್ರಿಯಸ್ತ್ವಮುಪಕಾರಿತ್ವಾತ್ ಸುರತತ್ವಾನ್ಮನೋಹರಃ .

ಏಕಾಂತಕಾಂತಃ ಸೌಮ್ಯತ್ವಾತ್ ಸರ್ವೈರ್ಬಹುಮತೋ ಗುಣೈಃ .. 100..

ಹೃದ್ಯೋಽಸಿ ನಿರವದ್ಯತ್ವಾದ್ರಮ್ಯೋ ವಾಗ್ರೂಪಸೌಷ್ಠವಾತ್ .

ಧನ್ಯಃ ಸರ್ವಾರ್ಥಸಿದ್ಧತ್ವಾನ್ಮಂಗಲ್ಯೋ ಗುಣಸಂಶ್ರಯಾತ್ .. 101..

ಪ್ರಣಿಧಿಸ್ತವೋ ನಾಮ ನವಮಃ ಪರಿಚ್ಛೇದಃ .

10. ಮಾರ್ಗಾವತಾರಸ್ತವಃ

ಸ್ಥಾಯಿನಾಂ ತ್ವಂ ಪರಿಕ್ಷೇಪ್ತಾ ವಿನಿಯಂತಾಪಹಾರಿಣಾಂ .

ಸಮಾಧಾತಾ ವಿಜಿಹ್ಮಾನಾಂ ಪ್ರೇರಕೋ ಮಂದಗಾಮಿನಾಂ .. 102..

ನಿಯೋಕ್ತಾ ಧುರಿ ದಾಂತಾನಾಂ ಖಟುಂಕಾನಾಮುಪೇಕ್ಷಕಃ .

ಅತೋಽಸಿ ನರದಮ್ಯಾನಾಂ ಸತ್ಸಾರಥಿರನುತ್ತರಃ .. 103..

ಆಪನ್ನೇಷ್ವನುಕಂಪಾ ತೇ ಪ್ರಸ್ವಸ್ಥೇಷ್ವರ್ಥಕಾಮತಾ .

ವ್ಯಸನಸ್ಥೇಷು ಕಾರುಣ್ಯಂ ಸರ್ವೇಷು ಹಿತಕಾಮತಾ .. 104..

ವಿರುದ್ಧೇಷ್ವಪಿ ವಾತ್ಸಲ್ಯಂ ಪ್ರವೃತ್ತಿಃ ಪತಿತೇಷ್ವಪಿ .

ರೌದ್ರೇಷ್ವಪಿ ಕೃಪಾಲುತ್ವಂ ಕಾ ನಾಮೇಯಂ ತವಾರ್ಯತಾ .. 105..

ಗುರುತ್ವಮುಪಕಾರಿತ್ವಾನ್ಮಾತಾಪಿತ್ರೋರ್ಯದೀಷ್ಯತೇ .

ಕೇದಾನೀಮಸ್ತು ಗುರುತಾ ತ್ವಯ್ಯತ್ಯಂತೋಪಕಾರಿಣಿ .. 106..

ಸ್ವಕಾರ್ಯನಿರಪೇಕ್ಷಾಣಾಂ ವಿರುದ್ಧಾನಾಮಿವಾತ್ಮನಾಂ .

ತ್ವಂ ಪ್ರಪಾತತಟಸ್ಥಾನಾಂ ಪ್ರಾಕಾರತ್ವಮುಪಾಗತಃ .. 107..

ಲೋಕದ್ವಯೋಪಕಾರಾಯ ಲೋಕಾತಿಕ್ರಮಣಾಯ ಚ .

ತಮೋಭೂತೇಷು ಲೋಕೇಷು ಪ್ರಜ್ಞಾಲೋಕಃ ಕೃತಸ್ತ್ವಯಾ .. 108..

ಭಿನ್ನಾ ದೇವಮನುಷ್ಯಾಣಾಮುಪಭೋಗೇಷು ವೃತ್ತಯಃ .

ಧರ್ಮಸಂಭೋಗಸಾಮಾನ್ಯಾತ್ ತ್ವಯ್ಯಸಂಭೇದಮಾಗತಾಃ .. 109..

ಉಪಪತ್ತಿವಯೋವರ್ಣದೇಶಕಾಲನಿರತ್ಯಯಂ .

ತ್ವಯಾ ಹಿ ಭಗವಂಧರ್ಮಸರ್ವಾತಿಥ್ಯಮಿದಂ ಕೃತಂ .. 110..

ಅವಿಸ್ಮಿತಾನ್ವಿಸ್ಮಿತವತ್ ಸ್ಪೃಹಯಂತೋ ಗತಸ್ಪೃಹಾನ್ .

ಉಪಾಸತೇ ಪ್ರಾಂಜಲಯಃ ಶ್ರಾವಕಾನಪಿ ತೇ ಸುರಾಃ .. 111..

ಅಹೋ ಸಂಸಾರಮಂಡಸ್ಯ ಬುದ್ಧೋತ್ಪಾದಸ್ಯ ದೀಪ್ತತಾ .

ಮಾನುಷ್ಯಂ ಯತ್ರ ದೇವಾನಾಂ ಸ್ಪೃಹಣೀಯತ್ವಮಾಗತಂ .. 112..

ಮಾರ್ಗಾವತಾರಸ್ತವೋ ನಾಮ ದಶಮಃ ಪರಿಚ್ಛೇದಃ .

11. ದುಷ್ಕರಸ್ತವಃ

ಖೇದಃ ಶಮಸುಖಜ್ಯಾನಿರಸಜ್ಜನಸಮಾಗಮಃ .

ದ್ವಂದ್ವಾನ್ಯಾಕೀರ್ಣತಾ ಚೇತಿ ದೋಷಾನ್ಗುಣವದುದ್ವಹನ್ .. 113..

ಜಗದ್ಧಿತಾರ್ಥಂ ಘಟಸೇ ಯದಸಂಗೇನ ಚೇತಸಾ .

ಕಾ ನಾಮಾಸೌ ಭಗವತೀ ಬುದ್ಧಾನಾಂ ಬುದ್ಧಧರ್ಮತಾ .. 114..

ಕದನ್ನಾನ್ಯಪಿ ಭುಕ್ತಾನಿ ಕ್ವ ಚಿತ್ ಕ್ಷುದಧಿವಾಸಿತಾ .

ಪಂಥಾನೋ ವಿಷಮಾಃ ಕ್ಷುಣ್ಣಾಃ ಸುಪ್ತಂ ಗೋಕಂಟಕೇಷ್ವಪಿ .. 115..

ಪ್ರಾಪ್ತಾಃ ಕ್ಷೇಪಾವೃತಾಃ ಸೇವಾ ವೇಷಭಾಷಾಂತರಂ ಕೃತಂ .

ನಾಥ ವೈನೇಯವಾತ್ಸಲ್ಯಾತ್ ಪ್ರಭುಣಾಪಿ ಸತಾ ತ್ವಯಾ .. 116..

ಪ್ರಭುತ್ವಮಪಿ ತೇ ನಾಥ ಸದಾ ನಾತ್ಮನಿ ವಿದ್ಯತೇ .

ವಕ್ತವ್ಯ ಇವ ಸರ್ವೈರ್ಹಿ ಸ್ವೈರಂ ಸ್ವಾರ್ಥೇ ನಿಯುಜ್ಯಸೇ .. 117..

ಯೇನ ಕೇನ ಚಿದೇವ ತ್ವಂ ಯತ್ರ ತತ್ರ ಯಥಾ ತಥಾ .

ಚೋದಿತಃ ಸ್ವಾಂ ಪ್ರತಿಪದಂ ಕಲ್ಯಾಣೀಂ ನಾತಿವರ್ತಸೇ .. 118..

ನೋಪಕಾರಪರೇಽಪ್ಯೇವಮುಪಕಾರಪರೋ ಜನಃ .

ಅಪಕಾರಪರೇಽಪಿ ತ್ವಮುಪಕಾರಪರೋ ಯಥಾ .. 119..

ಅಹಿತಾವಹಿತೇ ಶತ್ರೌ ತ್ವಂ ಹಿತಾವಹಿತಃ ಸುಹೃತ್ .

ದೋಷಾನ್ವೇಷಣನಿತ್ಯೇಽಪಿ ಗುಣಾನ್ವೇಷಣತತ್ಪರಃ .. 120..

ಯತೋ ನಿಮಂತ್ರಣಂ ತೇಽಭೂತ್ ಸವಿಷಂ ಸಹುತಾಶನಂ .

ತತ್ರಾಭೂದಭಿಸಂಯಾನಂ ಸದಯಂ ಸಾಮೃತಂ ಚ ತೇ .. 121..

ಆಕ್ರೋಷ್ಟಾರೋ ಜಿತಾಃ ಕ್ಷಾಂತ್ಯಾ ದ್ರುಗ್ಧಾಃ ಸ್ವಸ್ತ್ಯಯನೇನ ಚ .

ಸತ್ಯೇನ ಚಾಪವಕ್ತಾರಸ್ತ್ವಯಾ ಮೈತ್ರ್ಯಾ ಜಿಘಾಂಸವಃ .. 122..

ಅನಾದಿಕಾಲಪ್ರಹತಾ ಬಹ್ವ್ಯಃ ಪ್ರಕೃತಯೋ ನೃಣಾಂ .

ತ್ವಯಾ ವಿಭಾವಿತಾಪಾಯಾಃ ಕ್ಷಣೇನ ಪರಿವರ್ತಿತಾಃ .. 123..

ದುಷ್ಕರಸ್ತವೋ ನಾಮೈಕಾದಶಃ ಪರಿಚ್ಛೇದಃ .

12. ಕೌಶಲಸ್ತವಃ

ಯತ್ ಸೌರತ್ಯಂ ಗತಾಸ್ತೀಕ್ಷ್ಣಾಃ ಕದರ್ಯಾಶ್ಚ ವದಾನ್ಯತಾಂ .

ಕ್ರೂರಾಃ ಪೇಶಲತಾಂ ಯಾತಾಸ್ತತ್ ತವೋಪಾಯಕೌಶಲಂ .. 124..

ಇಂದ್ರಿಯೋಪಶಮೋ ನಂದೇ ಮಾನಸ್ತಬ್ಧೇ ಚ ಸನ್ನತಿಃ .

ಕ್ಷಮಿತ್ವಂ ಚಾಂಗುಲೀಮಾಲೇ ಕಂ ನ ವಿಸ್ಮಯಮಾನಯೇತ್ .. 125..

ಬಹವಸ್ತೃಣಶಯ್ಯಾಸು ಹಿತ್ವಾ ಶಯ್ಯಾಂ ಹಿರಣ್ಮಯೀಂ .

ಅಶೇರತ ಸುಖಂ ಧೀರಾಸ್ತೃಪ್ತಾ ಧರ್ಮರಸಸ್ಯ ತೇ .. 126..

ಪೃಷ್ಟೇನಾಪಿ ಕ್ವ ಚಿನ್ನೋಕ್ತಮುಪೇತ್ಯಾಪಿ ಕಥಾ ಕೃತಾ .

ತರ್ಷಯಿತ್ವಾ ಪರತ್ರೋಕ್ತಂ ಕಾಲಾಶಯವಿದಾ ತ್ವಯಾ .. 127..

ಪೂರ್ವಂ ದಾನಕಥಾದ್ಯಾಭಿಶ್ಚೇತಸ್ಯುತ್ಪಾದ್ಯ ಸೌಷ್ಠವಂ .

ತತೋ ಧರ್ಮೋ ಗತಮಲೇ ವಸ್ತ್ರೇ ರಂಗ ಇವಾರ್ಪಿತಃ .. 128..

ನ ಸೋಽಸ್ತ್ಯುಪಾಯಃ ಶಕ್ತಿರ್ವಾ ಯೇನ ನ ವ್ಯಾಯತಂ ತವ .

ಘೋರಾತ್ ಸಂಸಾರಪಾತಾಲಾದುದ್ಧರ್ತುಂ ಕೃಪಣಂ ಜಗತ್ .. 129..

ಬಹೂನಿ ಬಹುರೂಪಾಣಿ ವಚಾಂಸಿ ಚರಿತಾನಿ ಚ .

ವಿನೇಯಾಶಯಭೇದೇನ ತತ್ರ ತತ್ರ ಗತಾನಿ ತೇ .. 130..

ವಿಶುದ್ಧಾನ್ಯವಿರುದ್ಧಾನಿ ಪೂಜಿತಾನ್ಯರ್ಚಿತಾನಿ ಚ .

ಸರ್ವಾಣ್ಯೇವ ನೃದೇವಾನಾಂ ಹಿತಾನಿ ಮಹಿತಾನಿ ಚ .. 131..

ನ ಹಿ ವಕ್ತುಂ ಚ ಕರ್ತುಂ ಚ ಬಹು ಸಾಧು ಚ ಶಕ್ಯತೇ .

ಅನ್ಯಥಾನನ್ಯಥಾವಾದಿಂದೃಷ್ಟಂ ತದುಭಯಂ ತ್ವಯಿ .. 132..

ಕೇವಲಾತ್ಮವಿಶುದ್ಧ್ಯೈವ ತ್ವಯಾ ಪೂತಂ ಜಗದ್ಭವೇತ್ .

ಯಸ್ಮಾನ್ನೈವಂವಿಧಂ ಕ್ಷೇತ್ರಂ ತ್ರಿಷು ಲೋಕೇಷು ವಿದ್ಯತೇ .. 133..

ಪ್ರಾಗೇವಾತ್ಯಂತನಷ್ಟಾನಾಮನಾದೌ ಭವಸಂಕಟೇ .

ಹಿತಾಯ ಸರ್ವಸತ್ತ್ವಾನಾಂ ಯಸ್ತ್ವಮೇವಂ ಸಮುದ್ಯತಃ .. 134..

ಕೌಶಲಸ್ತವೋ ನಾಮ ದ್ವಾದಶಃ ಪರಿಚ್ಛೇದಃ .

13. ಆನೃಣ್ಯಸ್ತವಃ

ನ ತಾಂ ಪ್ರತಿಪದಂ ವೇದ್ಮಿ ಸ್ಯಾದ್ಯಯಾಪಚಿತಿಸ್ತವ .

ಅಪಿ ಯೇ ಪರಿನಿರ್ವಾಂತಿ ತೇಽಪಿ ತೇ ನಾನೃಣಾ ಜನಾಃ .. 135..

ತವ ತೇಽವಸ್ಥಿತಾ ಧರ್ಮೇ ಸ್ವಾರ್ಥಮೇವ ತು ಕುರ್ವತೇ .

ಯಃ ಶ್ರಮಸ್ತನ್ನಿಮಿತ್ತಂ ತು ತವ ಕಾ ತಸ್ಯ ನಿಷ್ಕೃತಿಃ .. 136..

ತ್ವಂ ಹಿ ಜಾಗರ್ಷಿ ಸುಪ್ತಾನಾಂ ಸಂತಾನಾನ್ಯವಲೋಕಯನ್ .

ಅಪ್ರಮತ್ತಃ ಪ್ರಮತ್ತಾನಾಂ ಸತ್ತ್ವಾನಾಂ ಭದ್ರಬಾಂಧವಃ .. 137..

ಕ್ಲೇಶಾನಾಂ ವಧ ಆಖ್ಯಾತೋ ಮಾರಮಾಯಾ ವಿಘಾಟಿತಾ .

ಉಕ್ತಂ ಸಂಸಾರದೌರಾತ್ಮ್ಯಮಭಯಾ ದಿಗ್ವಿದರ್ಶಿತಾ .. 138..

ಕಿಮನ್ಯದರ್ಥಕಾಮೇನ ಸತ್ತ್ವಾನಾಂ ಕರುಣಾಯತಾ .

ಕರಣೀಯಂ ಭವೇದ್ಯತ್ರ ನ ದತ್ತಾನುನಯೋ ಭವಾನ್ .. 139..

ಯದಿ ಸಂಚಾರಿಣೋ ಧರ್ಮಾಃ ಸ್ಯುರಿಮೇ ನಿಯತಂ ತ್ವಯಾ .

ದೇವದತ್ತಮುಪಾದಾಯ ಸರ್ವತ್ರ ಸ್ಯುರ್ನಿವೇಶಿತಾಃ .. 140..

ಅತ ಏವ ಜಗನ್ನಾಥ ನೇಹಾನ್ಯೋಽನ್ಯಸ್ಯ ಕಾರಕಃ .

ಇತಿ ತ್ವಮುಕ್ತವಾನ್ಭೂತಂ ಜಗತ್ ಸಂಜ್ಞಪಯನ್ನ್ ಇವ .. 141..

ಚಿರಾಯ ಭುವಿ ಸದ್ಧರ್ಮಂ ಪ್ರೇರ್ಯ ಲೋಕಾನುಕಂಪಯಾ .

ಬಹೂನುತ್ಪಾದ್ಯ ಸಚ್ಛಿಷ್ಯಾಂಸ್ತ್ರೈಲೋಕ್ಯಾನುಗ್ರಹಕ್ಷಮಾನ್ .. 142..

ಸಾಕ್ಷಾದ್ವಿನೇಯವರ್ಗೀಯಾನ್ಸುಭದ್ರಾಂತಾನ್ವಿನೀಯ ಚ .

ಋಣಶೇಷಂ ಕಿಮದ್ಯಾಪಿ ಸತ್ತ್ವೇಷು ಯದಭೂತ್ ತವ .. 143..

ಯಸ್ತ್ವಂ ಸಮಾಧಿವಜ್ರೇಣ ತಿಲಶೋಽಸ್ಥೀನಿ ಚೂರ್ಣಯನ್ .

ಅತಿದುಷ್ಕರಕಾರಿತ್ವಮಂತೇಽಪಿ ನ ವಿಮುಕ್ತವಾನ್ .. 144..

ಪರಾರ್ಥಾವೇವ ಮೇ ಧರ್ಮರೂಪಕಾಯಾವಿತಿ ತ್ವಯಾ .

ದುಷ್ಕುಹಸ್ಯಾಸ್ಯ ಲೋಕಸ್ಯ ನಿರ್ವಾಣೇಽಪಿ ವಿದರ್ಶಿತಂ .. 145..

ತಥಾ ಹಿ ಸತ್ಸು ಸಂಕ್ರಾಮ್ಯ ಧರ್ಮಕಾಯಮಶೇಷತಃ .

ತಿಲಶೋ ರೂಪಕಾಯಂ ಚ ಭಿತ್ತ್ವಾಸಿ ಪರಿನಿರ್ವೃತಃ .. 146..

ಅಹೋ ಸ್ಥಿತಿರಹೋ ವೃತ್ತಮಹೋ ರೂಪಮಹೋ ಗುಣಾಃ .

ನ ನಾಮ ಬುದ್ಧಧರ್ಮಾಣಾಮಸ್ತಿ ಕಿಂ ಚಿದನದ್ಭುತಂ .. 147..

ಉಪಕಾರಿಣಿ ಚಕ್ಷುಷ್ಯೇ ಶಾಂತವಾಕ್ಕಾಯಕರ್ಮಣಿ .

ತ್ವಯ್ಯಪಿ ಪ್ರತಿಹನ್ಯಂತೇ ಪಶ್ಯ ಮೋಹಸ್ಯ ರೌದ್ರತಾಂ .. 148..

ಪುಣ್ಯೋದಧಿಂ ರತ್ನನಿಧಿಂ ಧರ್ಮರಾಶಿಂ ಗುಣಾಕರಂ .

ಯೇ ತ್ವಾಂ ಸತ್ತ್ವಾ ನಮಸ್ಯಂತಿ ತೇಭ್ಯೋಽಪಿ ಸುಕೃತಂ ನಮಃ .. 149..

ಅಕ್ಷಯಾಸ್ತೇ ಗುಣಾ ನಾಥ ಶಕ್ತಿಸ್ತು ಕ್ಷಯಿಣೀ ಮಮ .

ಅತಃ ಪ್ರಸಂಗಭೀರುತ್ವಾತ್ ಸ್ಥೀಯತೇ ನ ವಿತೃಪ್ತಿತಃ .. 150..

ಅಪ್ರಮೇಯಮಸಂಖ್ಯೇಯಮಚಿಂತ್ಯಮನಿದರ್ಶನಂ .

ಸ್ವಯಮೇವಾತ್ಮನಾತ್ಮಾನಂ ತ್ವಮೇವ ಜ್ಞಾತುಮರ್ಹಸಿ .. 151..

ನ ತೇ ಗುಣಾಂಶಾವಯವೋಽಪಿ ಕೀರ್ತಿತಃ

     ಪರಾ ಚ ನಸ್ತುಷ್ಟಿರವಸ್ಥಿತಾ ಹೃದಿ .

ಅಕರ್ಶನೇನೈವ ಮಹಾಹ್ರದಾಂಭಸಾಂ

     ಜನಸ್ಯ ತರ್ಷಾಃ ಪ್ರಶಮಂ ವ್ರಜಂತಿ ಹ .. 152..

ಫಲೋದಯೇನಾಸ್ಯ ಶುಭಸ್ಯ ಕರ್ಮಣೋ

     ಮುನಿಪ್ರಸಾದಪ್ರತಿಭೋದ್ಭವಸ್ಯ ಮೇ .

ಅಸದ್ವಿತರ್ಕಾಕುಲಮಾರುತೇರಿತಂ

     ಪ್ರಯಾತು ಚಿತ್ತಂ ಜಗತಾಂ ವಿಧೇಯತಾಂ .. 153..

ಆನೃಣ್ಯಸ್ತವೋ ನಾಮ ತ್ರಯೋದಶಮಃ ಪರಿಚ್ಛೇದಃ .

ಅಧ್ಯರ್ಧಶತಕಂ ಸಮಾಪ್ತಂ . ಕೃತಿರಾಚಾರ್ಯಮಾತೃಚೇಟಸ್ಯ ..

ಇತಿ ಮಾತೃಚೇಟವಿರಚಿತಂ ಅಧ್ಯರ್ಧಶತಕಂ

ಅಥವಾ ಪ್ರಸಾದಪ್ರತಿಭೋಧವ ಶತಪಂಚಾಶತಕಂ ಚ ಸಂಪೂರ್ಣಂ .